Isbahaysiga Sacuudiga hogaaminayo oo Gantaal ku dilay 42 Soomaali ah oo doon saarnaa

2017-03-18 03:41:04

 


Ugu yaraan 42 qaxooti Soomaaliyeed ah ayaa lagu soo warramayaa in lagu dilay xeebaha dalka Yemen ka dib markii uu gantaal ku habsaday doontii ay ku safrayeen,waxaana Gantaalkan soo ridday Dayuuradaha isbahaysiga Sacuudiga oo aan la aqoon sababta ay u laayeen Qaxootigan ku socday Sudan ee Hey*adda UNHCR ka oo daad-gureysay Yemen


Ilo laamaha caafimaadka ka tirsan oo ku sugan dekedda jabhaduhu maamulaan ee Hodeidah ayaa sheegay in dadka dhintay ay ku jiraan haween iyo dhallaan, dad kale oo badan oo dhaawac ahna loo wareejiyay isbitaallada magaalada.


Ilaalada xeebaha ayaa saxafiyiinta u sheegay in qaxootigan oo wata warqado aqoonsi oo rasmi ah oo ay bixisay hay'adda qaxootiga u qaabilsan Qaramada Midoobay ay u sii socdeen Suudaan marka ay weerartay diyaarad kuwa qumaatiga u kaca ah.


Sawirro laga soo qaaday goobta ayaa waxa ay muujinayaan maydad daadsan doonta dusheeda. Ku dhawaad 80 qof oo badbaaday ayaa waxa loo qaaday cisbitaalada sida ay sheegtay hay'adda caalamiga ah ee socdaalka ee IOM.


Dekadda waxa gacanta ku haya fallaagada Xuutiyiinta, ee dagaalka labada sana socda kula jirta isbahaysiga uu hoggaaminayo Sacuudiga.


Isbahaysiga ayaa gacanta ku hayo maamulka hawada dalka Yemen.Sidoo kale mid ka mid ilaalada badda oo la yiraahdo Maxamed Alay ayaa wakaaladda wararka ee Reuters waxa uu u sheegay in diyaarad nooca qumaatiga u kaca oo ay qoryo ku rakiban yihiin ay weerarka geysatay.

Balse sarkaal ka shaqeeya dekada ayaa wakaalada wararka ee AFP waxa uu u sheegay in doonida ay soo xiratay, dadkii dhintay iyo kuwii dhaawacmayna lagu garaacay hub fudud.


Isbahaysiga uu Sacuudiga hormuudka u yahay weli kama aysan hadlin dhacdadani.

Dalka Yemen ayuuse dagaal sokeeye oo xun ka jiray tan iyo bishii saddexaad ee sanadkii 2015kii; saddex meloodow labo ka mid ah bulshada dalkaasina waxay qarka u saaran yihiin in ay maculuuli ku habsato

Shacabkamedia-Jinja-Ugandha

Runta Kama-Xıshoono

Email:Shacabkamedia@live.com

Comments

Opinions